DPWH Albay, ipighayag na tapos an Lahar Mitigation Project na makakatabang sa mga residente kan probinsya

LEGAZPI CITY – Ipighayag kan Department of Public Works and Highways (DPWH) Albay 2nd District Engineering Office (DEO) na tapos na an road dike project sa mga Barangay kan Sua asin Libod sa banwaan kan Camalig, Albay.

An nasambit na proyekto, pinondohan nin maabot sa P72.4 milyon kun sain pig-aasahan na makakatabang ini sa mga residente kan nasambit na banwaan para labanan an pagbaha asin banta nin lahar hale sa Bulkan Mayon.

Segun kay Albay 2nd District Engineer Warren B. Azotea, obheto kan nasambit na proyekto na matawan nin dugang na proteksyon an mga arong asin kabuhayan kan poco mas o menos si singkomil (5K) na bilang nin mga residente sa nasambit lugar kaiba na an mga harani asin kataraning na mga banwaan.

Dugang pa kan nasambit na opisyal, an nasambit subuot na proyekto, makakatabang man sa pagbawas sa mga gastos sa transportasyon asin makakapagtao nin potensyal na mas halangkaw na sweldo para sa mga lokal na paraoma sa probinsya.

Kun magigirumduman, enot naman na ipighayag ni DPWH Bicol Regional Director Virgilio Eduarte, na an lahar asin flood mitigation project kan saindang ahensya, pigpondohan sa irarom kan General Appropriations Act. (GAA) CY 2023.

Leave a Reply

Your email address will not be published. Required fields are marked *