BICOL – PIGCIERTO ngunyan kan Department of Health o DOH-Bicol na padagos an saindang monitoring sa iba pang nakakaulakit na helang dawa pa sabot sa pagsimbag sa presenteng pandemya.
Segun ki Dr. Aurora Teresa Daluro, Medical Specialist III kan DOH-Bicol, dawa pa nasa covid-19 an ‘focus’ ngunyan,dai soboot nakakalingaw an ahensya na magbantay laban sa iba pang helang na nagtataong huma ngunyan na nagbabago an panahon.
Padagos soboot an mahigot na monitoring kan mga health offices sa mga lokalidad sa rehiyon partikular sa mga helang tuyong panahon nin kalamidad.
Katakod kaini liwat na pinag-iingat kan ahensya an publiko sa WILD disease o an Waterborne Disease, Influenza, Leptospirosis asin Dengue.
Pahayag pa ni Daluro, dakula an naitabang kan ipinautob na quarantine kun saen mas natawan prayoridad kan publiko an pagmantiner na maray an salud siring man an pagkakaigwa nin malinig na kapalibutan , patunay soboot an na monitor na pagbaba kan mga kaso nin dengue.
Siring man dai soboot dapat makampante an publiko.
Apwera soboot sa Leptospirosis posible man soboot na makakua nin helang sa kublit kun nababad sa tubig-baha.
Inabisuhan man kan opisyal an publiko na pakuluan nguna nin tolong minuto an tubig na iinumon kun dai sigurado sa pinagkuanan kaini.
Dapat man soboot na lutuon na maray an mga pagkakan tanganing maka ibitar sa food poisoning.
Sa huri tinawan duon kan opisyal na an pagsunod sa minimum health standards asin pagmantiner kan kalinigan sa kapalibutan sa asin sa sadiri an pinaka armas, urog na ngunyan na panahon kun saen bako sana covid-19 an huma sa salud kan tawo.
