LEGAZPI CITY – Ipinaliwanag kan Department of Interior and Local Government (DILG) Albay na antes magtukaw an mga barangay officials, kinakaipuhan muna nindang magsumiter nin mga nagkapirang dokumento.
Segun kay Ray Caceres kan nasambit na ahensya, dai sinda pwedeng basta-basta sanang magtukaw sa posisyon na dai settled an mga dokumento.
Kaibahan sa mga isusumiter na mga dokumento an certificate of canvass and proclamation, oath of office asin certificate or letter of assumption.
Kinakaipohan pa ninda magsurat sa mga alkalde, COMELEC asin sa DILG kun anong aldaw sinda matukaw sa barangay nganing magin malinaw.
Segun pa kay Caceres, an mga nag oath-taking na barangay officials, bako man sinda sabay-sabay na matukaw.
Mientrastanto, saro pa sa mga hahagadon an Barangay Officials Information sheet (BOIS) kun saen nakalaag an tunay na pangaran, edad asin magigin benepisyaryo kaini en kaso magadan.
