MAGPABILING moabag ang kapulisan hangtud gikinahanglan sa mga tulunghaan karong nagsugod na ang klase.
Kini ang gibutyag ni PLt.Col. Aldrin Gonzales, tigpamaba sa General Santos City Police Office kun GSCPO nga sukad kagahapon nagpabilin ang deployment sa kapulisan sa mga tulunghaan ug prayoridad ang mga dagkong tulunghaan nga daghan ang estudyante.
Sa opening sa klase adlawng Lunes, Agosto 22, walay untoward incidents nga natala ug nanghinaut nga magpadayun ang hapsay ug malinawon nga sitwasyon.
Dugang pa ni Gonzales, kasagaran nga problema matud pa karong may klase na ang traffic congestion apan kung anaa na sa sulod sa tulunghaan, hapsay ug malinawon na usab.
Una na usab gibutyag ni Police Brigadier General Jimili Macaraeg, regional director sa Police Regional Office-12 nga magpadayun ang pag-abag sa kapulisan alang sa seguridad sa mga tulunghaan sa rehiyon 12. Gani giangkon usab nga ang deployment sa kapulisan sa mga tulunghaan ang year long program ug dili lang karong abli sa klase.
