HIMAS rehas ang usa ka delivery rider human nabisto nga naghimo-himo kini og storya nga gitulis ug gisikwat ang anaa sa kapin P17, 000 nga iyang koleksyon.
Ang suspek giila nga si Bryan Sistual Capote, 20 anyos residente sa Kulagsoy Brgy. Tacunan Davao City.
Sumala pa, duha ka lalaki nga nakamotor ang nition kaniya ug kutsilyo dihang nihunong siya kilid sa dalan sa Sitio San Miguel aron tawagan ang kustomer nga iyang hatdan og parcel sa milabay nga Enero 19.
Apan sa pagpanubay sa mga imbestigador sa Talomo Police Station, nasuta pinaagi sa usa ka Marvin Baylosis, usa sa iyang kustomer, nga wala siyay nadawat nga tawag ug parcel ug gitino nga walay komosyon.
Bisan ang mga residente sa lugar nagkanayon nga walay holdap incident sa ilang lugar.
Dugang pa sa imbestigasyon, nautingkay sa otoridad ang transaksyon ni Capote sa iyang e-wallet dihang dunay fund transfer transaction nga mikantidad og P17,464 nga susamang kantidad sa gideklara niining gitangag sa mga holdaper.
Wala na kalusot ug nakorner ang suspek ug hingpit niangkon sa mga imbestigador ug sa iyang mga employer nga dili tinood ang gipagawas niining senaryo nga gitulis iya.
Kasong alarm scandal ug theft ang ipasaka batok sa suspek.
