Nababagan sa mga sakop sa Task Force Davao ug PNP personnel ang usa ka dayo gikan Kidapawan City nga nagbitbit og illegal nga druga pasulod sa dakbayan sa Davao sa checkpoint sa Sirawan, Toril, ning syudad sa milabay’ng adlaw.
Ang dinakpan nailang si alyas Edgar, 47 anyos, driver nga taga- Riverpark Residential Estate, Brgy. Poblacion, Kidapawan City.
Sakay ang maong suspek sa van nga kolor puti, ug sa dihang atol sa checkpoint, nasiplatan sa otoridad ang gituohang glass tooter nga gibutang sa center small compartment sa dashboard sa maong sakyanan hinungdan nga gi-hold kini.
Atol sa pag-inspection, nakuha ang pakete sa gituohang shabu nga gibana-banaan nga dunay SDP nga 8,800 pesos ug uban pang Paraphernalia.
Kasamtangan, gikustodiya sa Toril Police Station ang dinakpan ug gihikay na ang gikinahanglang dokumento alang sa pagpasaka og kaso sa nahisgutan.