Nagpahigayon na og inspeksyon ang nagkadaiyang Barangay Disaster Risk Reduction and Management Center (BDRRMC) sa tanang mga himan isip kabahin sa pagpangandam sa pagsulod sa bagyong Odette ug mamahimo niining epekto sa Davao City.
Una niini, gimanduan nang daan ni City Disaster Risk Reduction and Management Council Head Alfredo Baloran ang tanang BDRRMCs volunteers nga magdoble-alerto sa ilang mga barangay tungod sa weather disturbance nga padayong gimonitor sa PAGASA.
Partikular nga gipa-igmat ang mga residente nga nagpuyo dool sa kabaybayunan sa 26 ka coastal barangays sa posibleng masinatian nga dagkong hapak sa balud ug kusog nga hangin sa kadagatan ug mga pagbaha sa mga nag-unang kasapaan sa syudad.
Lakip gipaigmat sa opisyal ang tanang mga rescuers alang sa paspas nga pagresponde sa posiboleng epekto unya sa bagyo.
Samtang ang Mines and GeoSciences Bureau-XI ubos sa DENR-Xi nagmando na sa mga residente sa Mt. Diwata sa Monkayo, Davao de Oro partikular sa Purok 15, 16 ug 17 nga mangandam ug kung mahimo magpatuman na opg pre-emptive evacuation sa posibleng hatud nga kadaot sa musuluray nga bagyo.
Base sa abiso sa MGB-XI, taas ang peligro sa nga makasinati og landslide ang maong mga lugar busa kinahanglan nga mopatuman og pre-emptive measure aron walay makalas nga kinabuhi.
Ang mga small scale miners usab giawhag nga undangon una ang mga aktibidad may kalabutan sa pagmina ug unahon una ang kaluwasan sa kaugalingon. Kahibaluang ang bagyong Odette gilauman nga musulod sa Philippine Area of Responsibility karong adlawa, Disyembre 14 subay sa report sa weather bureau kung diin apektado ang Sidlakang bahin sa Mindanao. Lauman kini nga molandfall sa Eastern Visayas o Caraga sa Huwebes sa hapon o gabie ug possible nga mahimong severe tropical storm nga dunay tsansa moabot sa typhoon category.BNFM-DAVAO
