Dili magpatuman og “No Vaccination, No Entry Policy” ang syudad sa Davao luyo.
Kini ang gihingusgan ni Davao City Mayor Inday Sara Duterte sanglit makaapekto kini pag-ayo lokal nga ekonomiya ilabi na ang mag gagmayng negosyante sa dakbayan nga wala pa hingpit nakabangon sukad sa pagsugod sa pandemya niadtong 2020.
Hinoon gitataw sa Mayor nga mamahimong magpatuman sa susamang guidelines ang mga business establishments sa mga fully vaccinated individuals sanglit dunay legal nga basehan.
Ubos sa Alert Level 2 asa nahisakop ang Davao City, pipila ka establishments ug activities ang tugutang maka-operate sa maximum 50 percent indoor venue capacity alang sa fully vaccinated individuals lakip 18 -anyos paubos, bisan sa mga unvaccinated, ug 70 percent outdoor venue capacity.
Kahinumdumang una nang gipugngan sa alkalde ang regulasyon alang sa mga fully vaccinated niadton Oktubre sanglit dali lang mapeke ang vaccination cards nga maoy himoong basehan kon ugaling ipatuman ang maong polisiya.
Hinoon sa karon naghulat pa ang syudad sa mga records sa VaxCertPh, usa ka online database alang sa vaccinated individuals nga magamit sa pagsayod sa vaccination status.
