Lakip sa lima ka mga napatay sa engkwentro sa tunga kang NPA kag militar kang Agosto 8, sa Barangay Aglonok, Calinog, Iloilo ang darwa ka mga tumandok kang probinsya kang Antique.
Dya ang ginkilala kanday Jovelyn Silverio alyas Darlyn, Kaykay, Akay, kag Porang, 37 anyos, kag residente kang Brgy. Patria, Pandan, kag si Jeilmor Gauranoc alyas Doc, Tango, Baron, 37 anyos, kag residente naman kang Brgy. Aras-asan, Sebaste.
Si Silverio ang asawa ni Erber Buencuchillo alyas Jess Yaman ukon Poks nga commander kang Regional Sentro De Grabidad (RSDG) Media-as Platoon, KR-Panay; dya man ang nagserbe nga Supply Officer kang KR-Panay, anay Platoon Political Officer kang Regional Sentro de Grabidad (RSDG), Media-as Platoon kang Southern Panay Front kag Sibat Platoon, Southern Front, KR-Panay.
Sunosa mga anay rebelde, si Silverio ang isara sa mga nagsulod kag nagraid sa Maasin PNP kang tuig 2017.
Sa pihak nga bahin, si Gauranoc naman ang rugyan sa watch list; katapo kang Regional Sentro De Gravidad kang KR-Panay; Anay katapo kang Squad 1, Southern Panay Front (D), KR-Panay, Gaisano Squad; Southern Panay Front (W) KR-Panay; anay katapo kang Mazda Squad, Suzuki (SYP) Platoon; Southern Panay Front, KR-P; kag anay katapo kang Team 2, squad 1, Suyak (SDG) Platoon, Southern Front, KR-Panay.
Samtang, ang tatlo naman ka mga napatay ang ginkilala kanday Aurelio Berjes Bosque, residente kang Brgy. Carvasana, Calinog, Iloilo; Armando Rogelio Sabares kang Brgy. Igcaratong, San Joaquin, Iloilo; kag Rumulo Ituriaga Gangoso kang Brgy. Bungsuan, Dumarao, Capiz.
Sa kadya, tatlo ron ka pamilya ang nag-adto kag nagkumpirma sa identity kang mga katapo kang NPA nga napatay lakip ang darwa ka mga Antiqueño, samtang ang darwa naman ang ginkilala kang andang mga anay kaimawan nga mga former rebels.
