LEGAZPI CITY – Nagin mahigot an pagbabantay kan Daraga Public Safety Office (PSO) asin kan Municipal Police Station (MPS) sa primerong aldaw kan filing nin Certificate of Candidacy (COC) para sa Barangay asin Sangguniang Kabataan (BSKE) 2023.
Nakataltag an saindang mga personahe sa runa kan banwaan partikularmente sa covered court kun sain nagsusumiter kan COC nganing masiyerto an saindang seguridad asin pagigin organisado kan lugar.
Mientrastanto, dawa igwa nin raot ki panahon, amay su boot na nagpuon an mga aspirantes na magpila kun sain nanutaran na nakaabot na sa luwas kan court an pila asin naokupar na an mismong parke huli sa kadakulan kan tawo.
Mientrastanto, basado sa ipinaluwas na schedule kan COMELEC, madurar an filing kan COC hasta sa Setyembre 2, alas 8 nin aga hasta alas 5 nin hapon.
