DAKU ang kalipay sa kapitan sa Barangay Tinagacan human nga aduna nay access road padulong sa bird sanctuary sa lugar ug padulong sa Lake Lanao.
Sa pahayag ni Kapitan Jeoffrey Salanio gikumperma niini nga 10 metros ang kalapad sa dalan nga ilang gihimo pinaagi sa ekipo sa pribadong tawo nga dili na gusto ma-headline ang pangalan gumikan sa iyang tabang sa taga barangay.
Sa bana bana ni Salanio anaa sa P300,000 pesos ang nagasto sa pag-abli sa dalan apan gilibre lang sa usa ka tawo.
Ang benipisyo daw niini sa ilaha sa barangay, una aduna nay saktong dalan padulong sa Lake Lanao nga gina-promote nga bird sanctuary sa syudad, dili na usab daw masamok ang moagi sa lugar kay sakto na nga area ang ilang gibutangan og dalan.
Sa karon usa palang ka access road ang ilang nahimo ug mangita pa sila og paagi nga makahimo pa ang laing mga agianan aron mapalambo pa ang Purok 5 sa Tinagacan hangtud sa Purok 15, usa usab kini sa top priority project sa barangay aron mahimuan og farm to market road aron sayon na ang pagpanaug sa mga produkto sa uma. l Ver Diazon