Padayon nga ginabulong sa Capiz Emmanuel Hospital ang isa ka dalaga matapos na sideswiped sang motorsiklo sa Brgy. Bago Chiquito, Panay, Capiz takna alas 11:58 kagab-i sang Sabado, Oktubre 21.
Ginkilala ang biktima kay alyas Zyra, 22-anyos, estudyante kag residente sang nasambit nga barangay.
Samtang ang driver sang motorsiklo amo si alyas Victor, 30-anyos, mamumugon kag residente sang Brgy. Linatiran, Panay.
Sandig sa impormasyon nagikan sa Panay Municipal Police Station, samtang ginasubay sang driver sang motorsiklo ang dalanon padulong sa Brgy. Linateran kaupod ang iya back rider nga si alyas Kerwin, aksidente sini nga na-sidewsiped ang biktima nga nagatindog sa higad sang karsada kun sa diin nagabulig sa iya amay nga magkuha sang ila dala sa traysikol nga naka-park.
Bangud sa natabo, nag-angkon sa pilas sa natuo nga batiis kag agtang ang biktima nga madasig naman gindala sa ospital.
Ginapahayag nga yara sa impluwensya sang makahulubog nga ilimnon ang suspek sang matabo ang aksidente.
Ginkustodiya naman ini sa Panay PNP lakip ang motorsiklo para sa nagakaigo nga disposisyon. | Judy Ann Juare
