DUGAY na ang problema sa sayong pagmabdos sa Barangay San Jose sumala sa Punong Barangay, adunay mga hinungdan ug wala daw nagapasagad ang mga opisyal kalabot niini gani nagapamalit na usab sila og contraceptives.
Sa paghinabi sa 89.5 Brigada News FM Gensan kay Kapitan Abdulrahim Paidumama ang early pregnancy dugay na nga problema gumikan sa kultura ug ang mga lockdowns gumikan sa pandemya sa COVID-19.
Gani sa iyang nasayran nga record niabot sa halos usa ka gatos ang namabdos atol sa pandemya lakip na dinhi ang mga menor de edad.
Tungod niini gisultihan sa kapitan ang ilang opisyal sa Sangguniang Kabataan nga iapil sa ilang programa ang intervention particular ang sex education, unya ang barangay nagapalit usab og mga condom.
Gidugang ni Paidumama nga bisan sa naandan na nga ibuya ang bata, mamahimo man nga dili mosugot ang bata sa gusto sa ilang ginikanan ilabi na niining panahona.
Sa usa ka kaso sa ilang barangay adunay batang babaye nga napugos sa pagminyo gumikan sa kadaghan sa iyang mga igsuon ug sa kapigaduhon ug aron makahaw-as sa kapigaduhon mas maayo nga magminyo na lang.
Gikumperma usab ni Paidumama nga 12-anyos ang pinakabata nga namabdos sa iyang mga sakop sa barangay mao nga uyon kaayo siya sa awareness og IEC Campaign sa City Population sa ilang barangay.
Kahibaluan nga sa kumpirmasyon ni City Population Officer Judith Janiola Top 1 sa small Barangays sa Gensan ang San Jose nga adunay 60 ka kaso sa Eerly pregnancy sa tuig 2020 samtang Top 1 sa dagkung barangay ang Labangal, samtang sa tibuok Gensan anaa sa 1,179 ka kaso sayong pagmabdos. (Ver Diazon)
