LEGAZPI CITY – Pigkumpirmar kan Philippine Fiber Industry Development Authority (PHILFIDA) na igwa sinda nin mga interbensyon katabang an Department of Agriculture (DA) para sa mga bakwit kan Bulkan Mayon na nawaran trabaho.
Sa intrevista kan Brigada News FM Legazpi kay PHILFIDA Bicol Regional Director Mary Ann Molina, pigsabi niya na obheto kaini na matawan nin livelihood opportunities orog na an mga pamilya ki mga paraoma na hale sa mga lugar na nasa laog nin 6km permanent danger zone.
Segun kay Molina, nagkapira sa mga programa/interbensyon na pig-oopresir kan duwang nasambit na opisina iyo an abaca twining asin abaca slipper-making.
An abaca twining asin abaca slipper-making, pig-oopresir sa mga evacuees kan Camalig asin Guinobatan, mantang abaca twining an para sa mga bakwit kan Tabaco City asin Malilipot.
An nasambitan na mga programa sarong klase ki training, alagad mantang sinda nasa irarom kan training, pagkakakitaan na ninda anuman an saindang ma-produce.
Dugang pa ni Molina, nakikipagkoordinar na sinda sa nagkapirang mga processors o exporters sa probinsya nganing matabangan an mga pamilya.
Siyerto na su boot na igwa sindang kita sa training na pig-oopresir huli ta an mga processors asin exporters totoong nangangaipuhan ki mga produkto.
