BICOL – Pig iingganyar ngunyan kan Civil Service Commission an mga Bicolano students na magparehistro asin makisumaro sa gigibohon na Student Congress sa rehiyon sa masunod na semana.
Segun ki Rona Nuñez, information office kan CSC-Bicol, isasagibo an Bicol Student Congress sa maabot na Oktubre a-kinse , aldaw nin biyernes alas dos nin hapon sa temang GovTalk 2021: Bridging the Gap for Future Talents in the Civil Service.
Bukas an nasabing aktibidad sa mga graduating senior high school asin college students kan mga pampubliko asin pampribadong eskwelahan asin unibersidad sa rehiyon.
Obheto kan Bicol Student Congress na madiskutir an dapat maaraman kan mga graduating students kun engkaso magkaka interes an mga ining lumaog sa gobyerno o kun mayo pang plano matawan an mga ini nin pangkagabsan na ideya sa kun ano an mga lalaoman.
Tolong subject-matter experts man an inimbitaran kan CSC-Bicol para diskutiron sa nasabing pagtiripon an importanteng isyu siring kan recruitment selection, employment opportunity, bulletin of vacant positions, public service values siring man an mga benepisyo asin oportunidad kan pagiging sarong goverment worker asin kadakul pang iba.
Dugang pa ni Nuñez, limitado an bilang nin slots kun kaya pig iingganyar kaini an mga interesadong makisaumaro na tolos nang magpa rehistro gamit an link na mahihiling sa saindang facebook page.
