NAGA CITY- Puno na o na sa critical level na ang COVID beds sa dalawang COVID referral centers sa Camarines Sur na Bicol Medical Center (BMC) na nasa Naga City at Bicol Region General Hospital and Geriatric Medical Center (BRGHGMC) dating Bicol Sanitarium sa bayan ng Cabusao.
Sa update ng Department of Health Bicol sinasabing 100% nang ukupado o nagamit ang COVID beds sa BMC habang tatlo na lamang ang bakante sa BRGHGMC.
Ang mga severe at critical cases lamang ang dapat na nasa mga COVID referral centers subalit ayon pa sa DOH Bicol may mga mild cases na na-rerefer pa rin sa naturang mga pagamutan.
Paulit-ulit ang kampanya ng Kagawaran ng Kalusugan na magpabakuna laban sa nasabing nakahahawa at nakamamatay na sakit subalit sa huling tala ng DOH sa 1, 454, 788 na indibidwal na target bakunahan sa buong lalawigan kabilang na ang dalawang lungsod 13% pa lamang nito ang fully vaccinated.
May mga nagdadalawang isip narin at nagtatanong bakit pa magpapabakuna kung may mga vaccinated ngang tinatamaan pa rin ng virus at nasasawi.
Sagot ni COVID-19 Vaccine Regional Coordinator Dr. Rita Mae Ang-Bon, ang pagpapabakuna ay nagdadadag ng proteksyon laban sa malalang epekto ng virus, makaiwas sa pagpapaospital at pagkamatay. Dulot nito maiiwasan din ang pagpupunuan ng mga treatment facilities at COVID referral centers.
