LEGAZPI CITY – Pinagpapadagos hasta sa ngunyan an contact tracing para duman sa COVID-19 positive na closed contact kan pinakaenot na Mayon evacuee na positibo man sa naunambitang helang sa evacuation camp kan Brgy. Gabawan, Daraga, Albay.
Sa nagin intrevista kan Brigada News FM Legazpi kay Denise Bobis kan DOH Bicol, pigkumpirmar kaini na an nasambitang closed contact iyo an dose anyos na lalaki na tulos dinara sa Daraga Infirmary hale sa isolation room kan nasambitang evacuation camp.
Sa ngunyan, padagos pang pighahanap kan ahensya an iba pang nakairiba kan duwang nagpositibo nganing tulos man na ma-quarantine asin dai na maglakop pa an helang.
Huli man sa nangyaring pagpositibo kan mga evacuees asin iba pang mga kahelangan/sintomas na namamatean kan nagkapirang evacuees, nagalibot asin nagkokondusir ki immunization services sa gabos na evacuation camps an manlain-lain na health teams kan ahensya katabang an Albay Provincial Health Office siring kan COVID-19 vaccination asin bakuna kontra pneumonia, measles, rubella asin polio.
