Nagpatigayon sang Consultative Meeting ang mga Barangay Officials sa mga Oyster and Fish Cage Operators sang Barangay Barra kaupod si Mayor Ronnie Dadivas may kaangtanan sa patigayunon nga dredging sa Panay River sa diin kalakip sila sa apektado.
Sa interview sang Brigada News FM kay Punong Barangay Ernie “Bobot” Borreros, ginpahayag sini nga nagkooperar man ang mga pumuluyo kag ila naintindihan ang maayo nga tinutuyo sang amo nga programa.
Dugang pa sini, nagpasugot ang mga Oyster and Fish Cage Operators nga himuson ang mga fish structure nga gintukod sa suba agud hatagan ligwa ang pagsugod sang dredging operations nga magaumpisa mismo sa Punta Barra.
Nagtambong sa nasambit nga konsultasyon si Mr. Joey dela Cruz nga nagrepresentar kay Governor Fredenil Oto Castro, DPWH-VI Representative Engr. Pedro Blancaver, DPWH 1st Engineering District Representative Engr. Julius Abella, PENRO Head Vicente Sardina, CENRO, Councilor Bords Viterbo, City Engineers Office kag City Agricultures Office. | Judy Ann Juare
