Nag-angkon sang pilas sa nawala nga kamot ang isa ka 25-anyos nga lalaki matapos ginbuno sang iya ex live-in partner sa Sitio San Juan, Brgy. Baybay, Roxas City.
Ginkilala ang biktima kay John Carl Dela Cruz samtang ang suspek amo si Honey Mae Balasa, 30-anyos kag lunsay residente sa nasambit nga lugar.
Sandig sa imbestigasyon sang Roxas City PNP, samtang nagalakat ang biktima padulong sa balay sang iya abyan nga si Jason Ulas, 25-anyos, para magkuha kuntani sang iya sweldo, nalabayan niya ang iya ex nga nagainom-inom sang makahulubog nga ilimnon kaupod sa mga abyan man sini.
Ginapahayag nga ginpabati-batian sang suspek ang biktima sang “Ang kampeon ko nga ex” apang nagdaretso lang lakat ang biktima.
Pag-abot ni Dela Cruz sa balay ni Jason, ginsilingan ini sang asawa sang iya abyan nga magbalik nalang buwas kay hubog pa ang iya mister.
Bangud dire, nagpauli ang biktima kun sa diin naglabay naman ini liwat sa iya ex kag nagsiling nga “Mig, waay ka kabalo nga adlaw-adlaw ko siya gina muna kung waay kah” rason nga ginkaakig ini sang suspek kag nagkuha sang kutsilyo kag ginbuno ang biktima.
Ginpadangat sa Roxas Memorial Provincial Hospital si Dela Cruz para sa nagakaigo nga pagbulong.
Sa karon, ginpabalhag na sang biktima sa ila barangay ang natabo. | Judy Ann Juare
