Gikatakdang abi-abihon sa Kapitolyo ang mga mayor sa Mindanao gikan sa League of Municipalities of the Philippines karong Agosto 7.
Ipaagi kini sa usa ka welcome dinner isip kabahin sa mga kalihukan sa Mindanao Island Cluster Conference nga mahitabo sa Sugbo nianang panahona.
Tungod niini, nakigsabot si Gobernador Gwen Garcia kang LMP-Cebu President Daanbantayan Mayor Sun Shimura ug LMP-Mindanao Vice President Jayson Joyce gikan sa Jose Abad Santos, Davao Occidental.
Natuki atol sa ilang pagbisita ang mga paagi aron magmalungtaron pa ang pagbinayloay sa mga maayong gawi gikan sa managlahing kalungsuran diin kini ang tinguha sa maong kalihukan.
Maong nakita ni Garcia ang kamahinungdanon niini ug midapit siya sa mga mayor nga moapil usab sa ilang kasaulugan sa 455th Founding Anniversary sa Sugbo karong Agosto 6.
