GIPAKUSGAN sa kapulisan ang pagbantay sa tanang buhatan sa Commission on Election (Comelec) sa munisipalidad, probinsiya ug siyudad. Tumong ang masiguro nga mamintina ang kahapsay sa seguridad ug masunod ang minimum health and safety protocols batok Covid-19.
Matud ni Police Brig. Gen. Michael John Dubria, Regional director sa Police Regional Office (PRO) 12 gipakatag na niya ang iyang mga sakop aron masiguro ang seguridad sa mga tawo atol sa pag-file og Certificate of Candidacy (COC) gikan Oktubre 1 hangtud 8 sa rehiyon-12.
Sa initial assessment sa kapulisan, gitan-aw nila ang posibilidad sa bahad sa seguridad apan wala pay impormasyon sa kasamtangan. Sa buhatan sa Comelec sa Sarangani ug GenSan, hugot ang pagpatuman sa health protocols asa ang aspirant ug duha ka kauban lang niini ang gipasulod.
Naghatag usab ang tanang mosulod og ilang health declaration, nakasuot sila og face shield ug face mask samtang naa sulod sa buhatan. ( Richel Gubalani)
