GINA-ANUNSYO sa taga Comelec Gensan nga nagsugod na ang ilang mall registration sa General Santos City aron maserbisyuhan ang mga katawhan nga gustong marehistro, mobalhin, mag-usab sa estado ug magpa-aktibo sa record alang sa umaabot nga 2022 Election ug sa gusto mokuha og voters certification.
Sumala kay Election Officer 4 Anwar Paidumama nagapasalamat sila kay nisugot dayon ang management sa Robinsons Mall nga mapasayo ang mall registration bisan kon adunay naunang kontrata ang Comelec Manila ug ang mall nga sa Septembre 20-24 pa ang schedule.
Tungod niini sa matag semana adunay tulo ka adlaw nga gigahin sa voters registration adlaw nga Lunes, Martes ug Miyerkulis, samtang sa nahibling adlaw ipadayon sa Comelec ang sattelite registration sa mga barangay.
Ang mga barangay nga anaa sa listahan sa Comelec mao ang Barangay San Isidro, Lagao, Buayan ug uban pang barangay samtang ilaha usab balikan ang Barangay San Jose nga nasuspenso ang registration gumikan sa kaso sa COVID-19.
Samtang nagmalampuson ang laing sattelite registration sa Comelec GenSan sa Barangay Katangawan ug Barangay Ligaya adlaw nga Biyernes ug adlaw nga Sabado.
Samtang gikumpirma ni Election Officer 4 Anwar Paidumama sa Barangay Katangawan niabot sa 813 ka aplikasyon ang ilang nadawat samtang sa Barangay Tinagacan dul-an 600 ka aplikasyon ang ilang nadawat.
sa mga nagpasa sa ilang mga pormas adunay new registrants, nay bagbalhin sa laing barangay o syudad,aduna usab nagpausab sa ilang estado gikan sa pagka-single ngadto na sa pagkaminyo.
Gidugang ni Paidumama nga alang sa mga nagabalhin sa laing barangay sulod lang sa Gensan dili na magpa-capture usab mao nga verification lang sa record mahimo na nga mouli.
Apan katong mobalhin og laing lugar ug sa mga bag-ong registrants kinahanglan gayod mopila alang sa Voter Registration Machine kon VRM. ( Ever Diazon)
