LEGAZPI CITY – Poon pa sana kan bulan kan Enero, nagpreparar na an Philippine National Police (PNP) Bicol para sa Barangay asin Sangguniang Kabataan Elections (BSKE) 2023.
Ini an pigkumpirmar ni PNP Bicol Regional Spokesperson PLt. Col. Malu Calubaquib sa Brigada News FM Legazpi.
Segun saiya, haloy nang preparado an saindang opisina orog na sa pagpoon kan filing kan Certificate of Candidacy ngunyan na aldaw.
Igwa na su boot na pigtaong direktiba sainda an national headquarters na mag-establisar nin media action center nganing ma-cater an gabos na mga concerns na may kinaraman digdi.
Kaibahan pa sa direktiba, iyo an magbugtak nin opisina kun sain gabos su boot na mga probinsya igwa nin mg represente sa kampo kaiba an COMELEC, Philippine Army asin iba pang mga ahensya na pwedesir makatabang sa election.
Pigsyerto man ni Calubaquib na preparado na an mga kapulisan para sa seguridad kan mga aplikante sa COC filing.
