Indi tanan nga dekorasyon sa sulod sang classroom pangkakason kag dapat hibaluon anay kun ano ang mga necessary kag unnecessary.
Ini ang ginpahayag ni Mr. Charlie D. Begas, School Principal IV sa CNHS sang ma-interview sang Brigada News FM Roxas City.
Matandaan nga base sa pahayag ni Vice President kag Education Secretary Sara Duterte, dapat kakason ang mga “unnecessary” nga nagatapik sa sulod sang classrooms agud mas makafocus ang mga kabataan sa ila nga leksyon sa baylo nga magkadto ang atensyon sini sa mga dekorasyon.
Suno kay Begas, mas kinahanglan sang mga kindergarten to elementary ang mga poster kasubong sang alphabet kag numbers nga nagatapik sa sulod sang ila nga classroom bangud makabulig ini sa ila nga pagtuon.
Dugang pa sang principal, nga nakadependi man ini sa pag-interpretar sang eskwelahan ilabi na sang mga manunudlo kun paano nila sundon ang DepEd Order no. 21, series of 2023.
Sa pihak nga bahin, nagpanugyan man si Begas sa mga ginikanan ukon guardian nga kun mahimo pasuksukon sang White T-shirt ang ila mga kabataan agud makilala nga estudyante kag magbutang sang name plate ukon name tag.
Bangud suno diri, kun nakade-color ang mga estudyante nabudlayan sila nga mag-identify kun estudyante pa sang CNHS ang nagasulod sa ukon indi.
Magapatawag man ang nasambit nga eskwelahan sang Parent-Teacher Association (PTA) Assembly Meeting sa Setyembre 9, Sabado nga adlaw agud klaruhon ang mga pamangkot natuhoy sa school uniform kag iban pa nga mga agenda.// Judy Ann Juare
