Pangungunahan nina Utah Jazz guard Jordan Clarkson at 7-foot-3 center Kai Sotto ang Filipino crew na magsusuot ng Gilas Pilipinas jerseys sa FIBA World Cup Asian qualifiers fourth window na gaganapin sa Beirut at Manila.
Inihayag ni Samahang Basketbol ng Pilipinas (SBP) executive director at spokesperson Sonny Barrios ang mga pangalan noong Lunes sa isang espesyal na Philippine Sportswriters Association (PSA) Forum.
Kabilang sa mga nakasama sa 13-man pool sina B.League star Kiefer at Thirdy Ravena, Bobby Ray Parks, at Dwight Ramos.
Maglalaro din sa national team ang mga PBA players na sina Japeth Aguilar, Scottie Thompson, Calvin Oftana at University of the Philippines ace Carl Tamayo.
Nakatakdang gumawa ng kanilang mga debut para sa Gilas sina Jamie Malonzo, Roosevelt Adams, at Chris Newsome.
Makakalaban ng Gilas ang Lebanon sa Huwebes sa Beirut, bago lumipad pabalik ng Maynila para labanan ang Saudi Arabia sa Lunes ng gabi sa Mall of Asia Arena.
