MALIPAYONG gibalita sa City Tourism Office nga ang Gensan Chamber of Commerce and Industry, Incorporated ang magdumala sa 2022 Tuna Festival sa syudad ug ang pondo mokabat sa P6 million.
Sa impormasyon nga gihatag ni Supervising Tourism Operations Officer Eliordo Alcaya Jr. sa Brigada, sumala niini nga nangita og partner ang LGU Gensan sa Tuna Festival ug ang Gensan Chamber of Commerce ang nidawat sa hagit.
Gi-aprubahan usab ni Mayor Lorelie Pacquiao kuyog sa Festival Board ang pagdumala sa Chamber apan adunay kausaban sa pag-release sa fundings.
Ang partnership sa LGU ug Chamber mahan-ay pinaagi sa Memorandum of Agreement kon MOA nga pa-aprubahan usab sa bag-ong konseho, ang una nga gikasabutan nga ang syudad ang mogunit sa pondo samtang ang Chamber ang bahala sa mga aktibidad lakip sa Tuna Congress.
Ang pondo sa miaging tuig nga virtual anaa lang sa P3 million ang pondo apan kay mamahimo na nga face to face na ang aktibidad gipadak-an sa mayor ang pondo ngadto sa P6 million.
Gidugang ni Alcaya nga ang dakung bahin sa pondo maadto sa mga papremyo sama sa Float Competition, Fish Fest sa Fishport ug sa uban pa nga programa gikan sa opening ug sa closing ceremony.
Ang tentative nga opening sa Tuna Festival sa Agosto 22 ug mahuman sa Septembre 5, 2022 apan mamahimo nga adunay kausaban sa petsa sa Opening.
Malaumon si Alcaya isip bag-ong tourism officer sa Gensan nga magmalampuson ang mga plano ug mapalambo paghbalik ang turismo sa syudad pinaagi sa festival nga na-apektuhan usab sa pandemya. I Ver Diazon
