LEGAZPI CITY – Kasusaro sana, may napabaretang RHU sa probinsya kan Albay na igwa su boot ki mga expired na bulong.
Kun magigirumduman, basado sa paliwanag kan opisina, dai kaya naipanao an mga bulong sa mga residente asin dai naman ninda kaipuhan.
Katakod kaini, pigheras kan Legazpi City Health Office an saindang lakdang nganing dai sinda magkaigwa ki expired na bulong.
Sa intrevista kan Brigada News FM Legazpi kay City Health Officer Dr. Fulbert Alec Gillego, sinabi niya na kun anong bulong an pinakakinakaipuhan kan syudad, iyo an saindang pinaprayoridad asin pigbabakal.
Kada bes su boot na nagduduman sinda sa mga bara-barangay asin nagkokondusir ki mga medical missions, saindang ining naipapanao sa mga nangangaipuhang residente.
Segun pa kay Gillego, may nagkapira man na mga bulong na kinakaipuhang naka-standby orog na pag nagkakaigwa ki kalamidad.
Alagad, kun igwa su boot na mga bulong na madali nang mag-expire asin kaipuhan sa ibang lugar, ini an panahon na ipagpapali-palit ini asin itatao duman sa mga mas nangangaipuhan.
Segun saiya, antes mag-expire an mga bulong, pwedesir man su boot ining hagadon, gamiton, asin magtarabangan nganing dai masayang.
