GIKUMPIRMA karon ni City councilor-elect Dominador Lagare Jr. nga daghang kausaban unya ang mapatuman sa paglingkod ni city mayor-elect Lorelie Pacquiao.
Matud ni Lagare nga sa iyang personal nga panglantaw, kinahanglan nga mabutang sa floating status ang kadtong mga department head nga sa tan-aw niini makahimo pa og dili maayong mga desisyon sa bag-ong administrasyon.
Lakip gipanganlan silang CSWDO head Genelyn Vidanes nga kaniadto pa wala kini mipabor ug misupak nga matuboy sa maong posisyon tungod dili kini residente sa GenSan.
Mao usab si HRMDO head Lea Tolimao nga alang kang Lagare, dili kalidad ang pagpili og mga empleyado nga himuong regular ug dili niya gusto nga kini nga pamaagi ang magpadayun.
Samtang giangkon nga hulaton usab ang desisyon sa ilang grupo ug ni Mayor-elect Lorelie Pacquiao apan sa personal nga opinyon sa abogadong konsehal, ubay ubayng department head ang gusto nga mapulihan o mabutang sa floating status aron malimitahan ang ilang impluwensya.
Lakip sa nabungat ni Lagare silang Engr.Riza Patches sa Public Safety Office nga gustong mabutang sa floating status, samtang questionable usab alang kaniya ang department head sa city hospital, city legal officer ug uban pa.