GI-DISPATCHED na sa Commission on Human Rights (CHR) ang ilang fact- finding team aron moimbestiga sa pagpatay sa duha ka batan-on sa M’lang, North Cotabato.
Matud ni Atty. Keysie Gomez, tigpamaba sa CHR-12 tumong sa team ang makisayod sa tinuod nga nahitabo sa magsuong Maguan. Giadtoan na usab nila ang gitudlong ‘person of interest’ kauban ang Department of Social Welfare and Development (DSWD) 12.
Nakigpulong na usab sila sa mga personahe sa Municipal Social Welfare and Development Office (MSWD) kalabut sa insidente. Gipatay ang 18 ug 16-anyos nga magsuon gamit ang baseball bat, giluba gamit ang kutsilyo sulod sa ilang balay sa Barangay Bagontapay.
Una nang, gibutyag ni Police Major Realan Mamon, hepe sa presinto sa lugar nga ang adopted nga miyembro sa pamilya ang miangkon kanila nga siya ang responsable sa insidente. Ang suspek ang naa sa kustodiya karon sa DSWD samtang ‘sibling rivalry’ ang gitudlong motibo sa krimen. I Richel Gubalani
