Nanindigan ang Department of Education (DepEd) na hindi nila ititigil ang pagpapatupad ng “Catch-up Fridays,” sa kabila ng mga panawagan ng mga grupo ng mga guro na suspindihin na muna ito.
Ayon kay DepEd Assistant Secretary Francis Bringas, hindi sila sumasang-ayon sa mga panawagan ng naturang mga grupo.
Nakikita naman daw ng DepEd na may mga bagay na kailangan talagang i-adjust sa Catch Up Fridays – at ang mga bagay aniyang ito ay tutugunan nila para maging mas maayos at maganda ang programa.
Mababatid na umapela ang Alliance of Concerned Teachers (ACT) at Teachers’ Dignity Coalition (TDC) sa education department na itigil at pag-aralang mabuti muna ang Catch Up Fridays dahil nagiging dagdag-pasanin lang umano ito sa mga guro.
