Paga himuon ru caravan para sa pagpadungog kay Palarong Pambansa Record Holder swimmer Jennuel Booh De Leon makarong adlaw, Agosto 7.
Sangka mainit nga pag welcome ru pagahimuon it Barangay Council sa pagpamuno ni Brgy. Capt. Manuel I. Tomilloso pinaagi sa caravan halin sa Barangay Lilo-an paadto sa Munisipyo’t Malinao pabalik sa nasambit nga barangay.
Paga himuon ru short program ag salo-salo sa kilid it “Libtong” nga naging training ground ni “Booh” paadto sa anang kasikatan nga paga atendiran it local nga pamunu-an it Malnao.
Mabahoe nga bugae ag inspirasyon ru gin tao ni Jennuel “Booh” De Leon sa mgakabataan nga nakipag compete sa kabilugan nga 17 ka mga teams halin sa bilog nga nasyon.
Si Jennuel De Leon hay estudyante it North Western Visayan Colleges sa banwa’t Kalibo, tubong Brgy. Lilo-an, Malinao, Aklan.
Si De Leon nagbreak it record sa Palarong Pambansa 2023 matapos maka angkon it gold medal 50m backstroke; freestyle ; gold medal 100 m free style; silver medal 100m back stroke; ag kaibahan man sa 4x50m medlay relay.
Ru nasambit nga mga medalya hay naangkon sa katatapos eamang nga Palarong Pambansa 2023 sa Marikina City humalin it July 29 hasta Agosto 5, 2023.
