Linibo nga oportunidad para sa mga Capisnon nga nagapangita sang trabaho internasyunal kag lokal ang gintan-ay sa ginpatigayon nga Capiztahan 2023 Grand Job Fair nga ginhiwat sa duha ka dako nga mall sa syudad, Abril 24.
Ini nga aktibidad ang ginapangunahan sang gobyerno probinsyal sang Capiz pinaagi sa Public Employment Service Office (PESO)- Capiz sa kooperasyon sang Department of Labor and Employment (DOLE).
Masobra 30 ka mga ahensya kag kompanya ang nagpartisipar dire kag kapin 3000 ka trabaho ang bakante nga mahimo aplayan sang mga job seekers.
Magluwas sini, may ginpatigayon man dire nga One-Stop-Shop nga ginapasakopan sang mga National Government Agencies nga ginalakipan sang DOLE; NBI; Philippine Health Insurance Corp.; Department of Migrant Workers/ Philippine Overseas Employment Administration Regional Office; SSS; PSA; TESDA; PAG-IBIG FUND Roxas Branch, PhilHealth kag DTI.
Nagpahamtang man sang Kabuhayan Baking Demo para sa mga interesado nga magkabalo agud mangin pangabuy-anan.
Naghatag man sang mensahe si Governor Fredenil Castro, nga sa karon nga administrasyon nga ang trabaho para sa pumuluyo ang isa sa iya ginahatagan sang pagtamod para sa maayo nga pagpangabuhi.
Isa ini sa ila ginahandum kaupod ang pagdumalahan sang Roxas City bilang One Capiz nga mapasanyog ang pagpangabuhi sang Capisnon, syudad kag bug-os nga probinsya sang Capiz.
Hugot man nga ginbilin sang gobernador nga sa pag-apply sang trabaho indi lamang ang diploma, kaalam kag kaabtik ang importante bangud isa sa pinakakinanglanon amo ang maayo nga pamatasan kag ini ang indi nila dapat pagkalipatan.
