Madinalag-on ang ginpatigayon nga Dugo Naton Para sa Capisnon: A Bloodletting Activity nga ginhiwat bilang kabahin nga aktibidad sang Capiztahan 2023 sa Sigma Community Heritage Center, Sigma, Capiz, Abril 26.
Sa interview sang Brigada News FM kay Mr. Ketch Armiza, Donor recruitment officer sang PRC-Capiz, ginpahayag sini nga tatlo ka bloodletting activity ang nakalinyada kun sa diin nag-una na sila sa pagpatigayon sang nasambit nga aktibidad sa banwa sang Pontevedra sadtong Abril 14 kag sa Roxas City, Abril 15.
Suno kay Armiza, ang bag-o tapos lang nga aktibidad ang ginpangunahan sang LGU-Sigma sa bulig sang Capiz Provincial Government kaupod ang Philippine Red Cross- Capiz Chapter kag Roxas City Filipino Chinese Chamber of Commerce, INC.
Ini nga aktibidad ang kabahin sa selebrasyon sang Capiztahan 2023 nga may tinutuyo nga magsalbar sang kabuhi pinaagi sa pagdonar sang dugo agud nga ibulig sa mga nagakinahanglan sini.
Dugang ni Armiza, isa ang banwa sang Sigma nga top performing nga nagadonar sang dugo kag nagasuporta sa PRC-Capiz.
Target sini nga aktibidad nga makakuha sang dugo sa kapin 500- 600 ka mga indibidwal. Pila sa mga nagpasakop dire amo ang mga opisyales kag pumuluyo sang 21 ka barangay sang Sigma, manunudlo kag estudyante sang ila mga buluthuan, NGO’s kag Municipal employees. | Judy Ann Juare
