Nagapabilin nga wala sang may nabalhag nga kaso sang Cholera sa probinsya sang Capiz humalin sadtong nakaligad nga tuig.
Ini ang ginpahayag ni Mr. Jeoffrey Espiritu, tagpamaba sang Capiz Provincial Health Office sang ma-interview sang Brigada News FM Roxas City.
Suno kay Espiritu, ang Cholera ang isa ka acute intestinal infection nga mahimo makuha sa mga pagkaon ukon tubig nga kontaminado sa bacterium Vibrio Cholerae.
Ang sintomas sang sini nga balatian amo ang diarrhea kag pagpalanuka nga posible magdangat sa isotonic dehydration.
Ginpahayag man sini nga wala sang ginapili nga edad ang Cholera kag nakadependi ini sa kabaskugon sang immune system sang isa indibidwal.
Dugang pa ni Espiritu, ang nasambit nga balatian ang magaresulta man sang kamatayon kun ini ang mapabayaan kag indi gilayon mabulong.
Nagpanugyan man ini sa publiko nga ugalion mag-inom sang matinlo nga tubig kag likawan ang pagkaon sang mga pagkaon nga nahulunan sang mga insekto ukon ilaga. Ipabilin nga malimpyo ang palibot kag mga gamit sa sulod sang balay agud makalikaw sa sini nga balatian. | Judy Ann Juare
