LEGAZPI CITY – Nagkondusir nin post-evacuation management assessment sa Mayon Volcano operations an Camalig Municipal Disaster Risk Reduction and Management Office (MDRRMO).
Pinagpartisiparan ini kan 17 response clusters asin mga opisyales de barangay kan Tumpa, Quirangay, Sua, asin Anoling siring kan mga kapitan asin secretary na naapektaran kan pag-alburoto kan bulkan.
Obheto kaini na mahiling an pinagkaiba kan mga pigbilog na plano kumpara sa aktwal na aksyon orog na nganing ma-identipikar man kun ano an tama asin sala, mga kaipuhan pang pakusugon asin mga pwedesir manudan sa sitwasyon.
Segun kay MDRRMO Chief Rommel Negrete, Jr., bako man sana sa eksperyensya makakanuod an mga tawo kundi magin sa pag-analisar kan nangyari, huli ta sa paagi kaini mas maaaraman kun ano an mga kaipuhan maibetaran nganing dai na masala giraray pag-abot kan panahon.
Mientrastanto, diretso suboot an pagsagibo ninda nin situational reports sa manlaen-laeng operasyon sa pagresponder na may kinaraman sa abnormalidad kan bulkan.
