LEGAZPI CITY – Nasunog kahapon ang ilang bahagi ng Mt. Binakuhan, Sitio San Isidro, Brgy. Puro sa lungsod ng Legazpi.
Ayon sa Bureau of Fire Protection (BFP) Legazpi, bandang 5:30 ng hapon nang makatanggap sila ng tawag mula sa isang concerned citizen tungkol sa insidente na agad naman nilang nirespondehan, kung saan tumagal ng higit isang oras ang pag-aapula nito.
Hindi naman gaano kalaki ang pinsala subalit mabilis na kumalat ang apoy dahil tuyo ang dahon at mainit ang panahon at napag-alaman din na mayroong nagsusunog sa lugar at ito ay pinabayaan.
Dahil dito, payo ng BFP na huwag iwanang may apoy ang talahiban upang maiwasan ang kaparehong insidente.
