NAKATALA ang Bureau of Fire Protection o BFP og kapin P855,000 damyos sa sunog sa Gensan sa bulan lang sa Agosto 2022.
Basi sa datus sa BFP gawas sa natala nilang taas nga kaso sa sunog kaniadtong Enero misaka usab ang kaso sa sunog sa bulan sa Agosto sa kasamtangan nga tuig.
Kadaghanan niini mga balay ug structural buildings. Matud ni Senior Fire Officer 1 (SFO1) Filamer Acub lakip nga nakatampo sa dakong kantidad sa damyos ang sunod-sunod nga pagkasunog sa duha ka balay nga nahitabo sa Barangay Fatima kaniadtong Agosto 26-27.
Gibutyag sa opisyal nga sagad hinungdan sa sunog sa dakbayan ang sayop nga mga outlet sa kuryente sulod sa mga balay lakip ang nabiyaan nga mga nilung-ag sa kusina.
Dugang niini naa sa duha hangtod tulo ka sunog ang nagakahitabo sa dakbayan sulod sa usa ka semana.
Dungan sa pagsugod sa abli-klase karong tuiga ang pahinumdom ni Acub sa publiko nga likayan ang paggamit og mga substandard nga mga saksakan sulod sa balay nga dili haom sa mga appliances nga gamiton.
Likayan usab ang pagdali-dali hinungdan nga makalimot na sa pag-tanggal sa nakasak-sak nga mga appliances sama sa plantsa ug uban pa kini aron makalikay sa sunog. I Enamie Mogpon
