LEGAZPI CITY – Inanunsyar kan Albay Provincial Health Office (PHO) na nakatalaang ikondusir sa bulan nin Marso an “Buntis Summit”.
Sa intrevista kan Brigada News FM Legazpi kay Safe Motherhood Coordinator Julien Orbase-Garcia, sinabi niya na ini an saindang na-conceptualize na aktibidad katakod kan Aldaw kan mga Bados sa Marso 10.
Katuwang ninda digdi an Bicol Regional Hospital and Medical Center (BRHMC) kun sain titipunon an mga bados hale sa mga munisipyo asin syudad kan probinsya.
Segun saiya, sa aktibidad na ini magkakaigwa nin manlain-laing mga serbisyo para sa mga bados siring kan pre-natal checkup asin may mga OB-Gyne specialist na magigi abilable sa aldaw na ini nganing mapromotir an saindang salud asin makapangaki sinda nin ligtas.
Kun masasapinal asin maaprubaran, ikokondusir ini sa Albay Astrodome.
High-risk pregnant women su boot an target kan aktibidad orog na su mga hale sa mga hararayong lugar sa probinsya.
Mientrastanto, tinawan-doon ni Garcia na an gabos na serbisyo sa irarom kani, libreng maa-avail kan mga bados.
