LEGAZPI CITY – Pwedesir su boot na magkaigwa nin sudden eruption o biglaang pagputok an Bulkan Mayon dawa pa wara ini nin warning na hale sa PHIVICOLS.
Ini an sinabi ni APSEMO Chief Dr. Cedric Daep sa pigsagibong press briefing sa Provincial Capitol.
Segun kay Daep, ini an problema sa bulkan na dawa pa marayon asin magayon an mga instrumentong piggagaramit kun sain kayang hilingon an mga parameters, posible ining pumutok sanang biglaan.
Ini man su boot an rason kun nata igwa nin permanent danger zone, asin kun nata kaipuhan magdeklarar ki no human activity sa palibot kaini.
Siring kaini su boot kaini an nangyari kan February 2, 1993, kun sain puminutok ki bigla an bulkan na wara ki anuman na warning o precursor basado sa pigpapahiling kan instrumentation.
Alagad, segun kay PHIVOLCS Resident Volcanologist Paul Alanis, bako sana ini ekslusibo sa Mayon, kundi magin an gabos man na bulkan.
Siring su boot kan nakalihis na taon, kan puminutok an Bulkan Bulusan mantang ini nasa alert level zero.
Segun kay Alanis, nagkaigwa nin sudden phreatic eruption an nasambitan na bulkan.
Kun kaya, padagos an pagpapagiromdom sa publiko na peligroso an mga lugar na harani o nasa laog kan 6 kilometers danger zone kan bulkan kaya dai na magpabaralik-balik pa.
