Nagpasya ang House Committee on Appropriations na irekomenda ang pagtapyas sa panukalang budget ng Office of the Vice President sa susunod na taon.
Sa press conference sa Kamara ngayong araw, kinumpirma ni Appropriations Senior Vice Chairperson Stella Quimbo na mula sa 2.037 billion pesos ay iminungkahi ng mga miyembro ng komite na gawin na lamang itong 733.2 million pesos.
Ibig sabihin, 1.293 billion pesos ang ibinawas sa panukalang pondo na ililipat naman sa Assistance to Individuals in Crisis Situations o AICS ng DSWD at Medical Assistance for Indigent and Incapacitated Patients Program ng DOH.
Sinabi ni Quimbo na hindi pa ito pinal dahil dadaan pa sa plenary deliberations ang proposed budget at sa bicameral conference committee sakaling aprubahan sa ikatlo at huling pagbasa ang General Appropriations Bill.
