Sa pihak it pagtaas it numero it mga domestic tourist arrival, mahaeong gihapon ro Boracay sa pagbukas it isla para uman nga buhion ro industriya it turismo nga naapektuhan bangud sa covid-19 pandemic.
Tinamaan it pandemya ro ekonomiya it Aklan partikular ro turismo ag pangabuhian it kaabuan sa mga tawo sa isla.
Eubos nga nag antus ro hospitality ag tourism industry sa tiempo it pandemya.
Matandaan nga sa tatlong buean nga nagtaliwan, nagtaas ro kaso it covid-19 sa makaalarma nga level rasun agud magpatuman ro gobyerno it mas istrikto nga granular ag surgical community lockdowns para makalikaw sa virus.
Ku Oktubre, nag umpisa nga mag abo ro turista sa Boracay matapos haeugaan ro pilang restrictions bago ro Paskwa ag Bag-ong Dag-on.
Haum eonman ro Boracay nga sugaeawon nga salbar ro mga turista bangud umabot eon sa mataas nga vaccination rate ro mga tourism workers ag residente it isla. / ANN DESLENE SALAZAR
