Suspendido ang biyahe ng mga maliliit na sasakyang pandagat sa sa ilang bahagi ng Southern Luzon dahil pa rin sa masamang panahon dulot ng hanging habagat.
Ayon sa abiso ng Coast Guard District Southern Tagalog, bawal maglayag o pumalaot ang maliliit na barko lalo na ang mga bangka sa Romblon, Marinduque, Occidental Mindoro, Lubang Island, Northern Quezon, Polilio Group of Islands at Oriental Mindoro.
Nabatid na tanging sa bahagi ng Polilio Islands sa Quezon may nakataas na Storm Signal sa buong Timog Katagalugan dahil sa Bagyong Goring.
Sa Batangas, bagama’t walang nakataas na gale warning, mahigpit ang paalala ng ahensya sa mga maglalayag na maging alerto at obserbahang maigi ang lagay ng karagatan.
Samantala, anumang oras ay posibleng balik na rin sa normal ang biyahe kung aalisin na ang gale warning na ibinabala ng PAGASA.
