PAGPASALAMAT ang nagpatigbabaw sa mga pulong ni Vice Mayor Rosalita Nuñez alang sa Brigada Group tungod sa pagka-abot niini og 17 ka tuig nga pagserbisyo ug nakahatag og opurtunidad sa kadaghan.
Matud ni Nuñez nga nakatampo og dako ang Brigada sa ekonomiya sa GenSan ug gipasalamatan niya kini ug nanghinaut nga mudugay pa ang kompanya aron daghan pa ang matabangan.
Giangkon usab sa bise mayor nga dakong dungog kaniya nga makadungog og balita nga ang nag-report gikan sa GenSan pinaagi sa Brigada nga gipaila sa mapa ang dakbayan.
Ang pagpamulong ni Nuñez naatol sa pagdawat sa Brigada og recognition sa 20th Sangguniang Panlungsod dungan sa 16th regular session, Martes, Nobyembre 15.
Hugot usab gipasalamatan sa Brigada ang nadawat nga pag-ila ug matud ni Assistant General Manager sa Brigada Mass Media Corporation, Erine Gale Dejecacion nga first time nga napasidunggan sa konseho ang Brigada ug nagpasalamat nga nakit-an ang mga nakab-ot sa kompanya, nga nahimong rags to riches ang istorya sa kalampusan ug hangtud nga nahimo nang nationwide ang operasyon.
