GIPATUMAN na sa lungsod sa Magsaysay Sa Davao del Sur ang hugot nga quarantine procedures sa tanan niining borders human gikumpirma ang pinakaunang kaso sa Influenza (AI) H5N1 o Bird Flu sa Barangay Santiago nga maoy una s Davao Region.
Sumala kang Municipal Agriculturist Helen Carampatana, base sa nigawas nga resulta gikan sa Department of Agriculture Regional Office XI nagpositibo ang blood sample sa itik nga gikuha niadtong Marso 9, 2022.
Dugang sa opisyal nga mokabat na karon sa 3,008 ka pato ang gipailawum sa depopulation sa DA-Regulatory Division ug Provincial Veterinary Office aron mapugngan dayon ang pagkatag sa sakit.
Nasuta usab nga ang nagpositibong pato naggikan sa President Quirino, Sultan Kudarat kinsa una nang nagdeklara og Bird Flu outbreak.
Subay sa abiso, hugot ipatuman ang mga gabayan nag sundon alang sa domestic ug wild birds, pinasubay sa DA-MC 05 ug Municipal Ordinance No. 03-2006.
Sa karon aktibo na ang required quarantine procedures sa tanang borders ubos sa pagdumala sa tanang Barangay Health Emergency Response Teams (BHERTs) aron masanta gilayon ang pagkatag sa H5N1 virus sa ubang mga lugar.BNFM-DAVAO
