PIGKOKONSIDERAR na dakulang trayumpo sa lado kan kapulisan sa rehiyon an magayon na resulta kan saindang kampanya na pagbukod sa mga indibidwal na nagtatago sa ley asin igwang kinakaatubang na mga kaso.
Base kaya sa record kan PNP-Bicol, puon Abril bente tres hasta Setyembre trenta ngunyan na taon nasa dos mil kinyentos sitenta y otsong mga wanted persons an saindang nasakote sa mga ikinasar na operasyon sa man iba ibang lugar sa rehiyon.
Kabale digdi an pitong Regional Level; bente siete sa Provincial Level; kinse sa City Level; kwatro sientos singko sa Municipal Level; asin lampas dos mil na iba pang mga wanted personalities.
Mantang an probinsya kan Camarines Sur an nakapagrehistro nin pinakadakul na naaresto na nag aabot sa kinyentos otsenta y kwatro ; sinundan kan Sorsogon province na igwang kinyetos bente kwatrong arrested wanted persons; Masbate na igwang kwatro sientos kwarente y uno; kwatro sientos nueve sa Albay; Camarines Norte na igwang dos sientos nobente y songko, asin dos sientos kwatro na mga wanted persons man an nadakop sa islang probinsya kan Catanduanes.
Dakulang tabang soboot an mga ipinapaabot na impormasyon kan mga residente kan lugar tanganing matunton kinamumugtakan kan mga wanted criminals siring man an kooperasyon asin tultol na koordinasyon sa man iba ibang mga hepatura kan pulisya s aluwas man o laog kan rehiyon.
Nagtutubod man an PNP-Bicol na an pagkakasararo asin suportang nareresibe kan organisasyon an pinakapusog asin epektibong estratehiya tanganing magtrayumpo sa saindang kampanya kontra kriminalidad.
Padagos man na pighahagad an kooperasyon asin suporta kan mga namamanwaan kasabay an apelar na dai pabayaan na igwang nagbabalaw bagaw na kriminal na pwediser na maging huma sa kaligtasan kan pamilya asin bilog na komunidad.
