Ginapahayag nga may deperensya sa paminsaron ang biktima nga napatay sa pagpaluthang sang iya bayaw sa Brgy. East Villa Flores, Maayon, Capiz.
Matandaan, ginkilala ang biktima kay Mark Dordas samtang ang ginatudlo suspek amo si Jonel Carillo, 34-anyos, negosyante kag lunsay mga residente sang nasambit nga lugar.
Sa interview sang Brigada News FM Roxas kay Marlon Dordas, magulang sang biktima, ginklaro sini nga siya ang ginbakbakan sang handle sang map kag indi ang iya utod nga babayi.
Suno kay Marlon, temprano palang sang Lunes nga adlaw, nagapinangakig kag nagapinangmulay na ang iya utod nga si Mark sa sulod sang ila balay.
Pag-abot sang alas 7 sang gab-i, ginpangpatyan sila sang suga sang biktima kag ginpangsaradhan sang pertahan.
Dugang pa ni Marlon, nga nag-agi siya sa bintana agud makasulod sa ila nga kwarto apang siya ang nakita ni Mark kag ginlampusan siya sang handle sang map.
Gin-agaw sini kay Mark ang handle apang siya ang natumba.
Ginbuksan ni Marlon ang pertahan kag didto na nagsulod ang iya bayaw nga si Carillo nga may dala na nga armas.
Ginpaarakan sang luthang ni Carillo si Mark tubtob nga naubos ang bala sa magazine sang .45 calibre nga armas-luthang.
Bangud sa natabo, nag-angkon sang patal nga mga pilas si Mark nga gintunaan sang iya kamatayon.
Madasig naman nga nagpalagyo si Carillo matapos ang nakumiter nga krimen.
Nahibaluan nga ginpatay ni Mark ang ila amay kag ini ang ginpasulod sa mental hospital para mabulong.
Gintuad ni Marlon nga may gina-maintenance nga bulong ang iya utod apang ila nadiskubrehan nga wala sini ginainom bangud nagapati si Mark nga ginahiluan siya.
Sa karon, ang bangkay ni Mark ang yara na sa isa ka punerarya samtang ang suspek ang padayon pa nga ginapangita sang mga kapulisan. | Judy Ann Juare
