Uman nga nagpadumdom ro Bureau of Fire Protection kaangot sa Oplan Paalala Iwas Paputok Sakuna at Sunog.
Sa pahayag sa BRIGADA NEWS FM KALIBO ni SFO3 Ricky P Domingo, Acting Municipal Fire Marshal it Tangalan Fire Station, dapat doble ro paghaeong it publiko eabi eon makarung nagahilapit ro Kapaskwahan ag Bag ong Dag on.
Ginhayag pa ni SFO3 Domingo nga kung magbakae it mga Christmas lights, pili-on ro aprubado it DTI ag i-off raya kung nagakatueog eon o gapanaw it baeay.
Likawan man ro magkabit it mga iwag sa mga Christmas tree nga himo sa metal para makalikaw sa posibleng sunog.
Nagpadumdom man raya nga mas mayad nga indi maggamit it paeupok ag sa baylo hay gumamit eon lang it torotot ag iba pang bagay nga naga krear it sangag ag kahayag.
Pero kung indi gid malikawan nga bumakae it firecrackers o paeupok, bumakae eamang sa may mga permit ag sa designated area.
Sa Tangalan, ro designated area nga pwedeng mabakean it paeupok hay sa Brgy. Panayakan.
Samtang, ginhayag man ni SFO3 Domingo nga naka Santa attire sanda makarun bangud nagaagto sanda sa mga barangay ag eskwelahan para magtao it lectures ag safety tips sa nagahilapit nga Yuletide season. // ANN DESLENE SALAZAR
