LEGAZPI CITY – May pahayag na an Bureau of Fire (BFP) Ligao City mapadapit sa insidente nin pagkasulo nin sarong SUV sa sarong tinampo sa nasambit na lugar kan nakalihis na Martes.
Sa intrevista kan Brigada News FM Legazpi kay Senior Fire Officer 1, Leo Buen, Chief Investigator ng Ligao City Fire Station, sinabi kaini na pasiring kuta na sa Legazpi City hale sa Bato, Camarines Sur an duwang sakay kan nasambit na lunadan.
Napansin su boot kan duwa na dai na naggagana an aircon pati naman an iba pang accessories kan awto kaya pinundo ninda ini nganing i-check.
Alagad nahiling ninda na nasusulo na an enotan na parte kan lunadan kaya tulos nindang binuksan an hood kaini, alagad nin huli ta nag-malfunction an alternator, nagkaigwa nin electrical fault kaya nasulo ini.
Dugang pa ni Buen, maray na sana ta wara ki nakuluga o nalugadan sa insidente.
Sa tabang naman kan mga personahe ninda, tulos man naapula an kasulo.
Pagirumdom ni Buen sa gabos na mga may tagsadiri ki lunadan, dai paglingawan an BLOWBAGETS, asin i-check an gabos na pwedesir pagpunan ki kasulo nganing magin ligtas.
Photo Courtesy: Francis Nate/DPWH3rd DEO
