Nakahanda na ang Barangay Baybay sa syudad sang Roxas sa posible pagdagsa sang mga tawo sa ila lugar kadungan sang pagbukas sang People’s Park kag pagselebrar sang Sinadya Festival 2023 sa maabot nga bulan sang Disyembre.
Sa interview sang Brigada News FM Roxas City kay Kapitan Erwin Oroceo, iya ginpahayag nga isa ang Barangay Baybay nga mangin venue sang pila ka aktibidad sa pagahiwaton nga kapiestahan gani upod sa iya konseho nagpatigayon na sila sang sinapol kag ila nahinalaan kun paano mapabilin nga malinong kag matawhay ang ila barangay.
Suno kay Oroceo, magafull-alert ang iya mga tanod sa pagbantay sa palibot kag ini ang paga-updan man sang mga kapulisan.
Dugang pa sini, nga amat-amat naman nga magabalik ang mga street food vendors apang indi pa sang permanente bangud nakadependi pa ini sa City government.
Ginapanan-aw naman ni Oroceo nga magadagsa gid ang mga tawo sa lugar bangud sa pagbukas sang people’s park nga isa sa mga ginalagawan sa syudad sang Roxas. | Judy Ann Juare
