DEAD on the spot ang usa ka manindahay og balut human nabanggaan sa may Ecoland Times beach Coastal road ning syudad, alas-6:05 kagabii.
Nailhan ang biktima nga si Lucio Buenaflor, 74 anyos, nga taga- Felomina Street, SIR New Matina Davao City.
Samtang ang nakaligis mao ang Ford Ranger Pick-up nga gimaneho sa usa ka Napoleon Dexter Parada Castro, 48, residente sa B47 L30 Country Homes Buhangin, Davao City.
Sa inisyal nga imbestigasyon sa kapulisan, gisubay sa pick up ang Coastal Road Tulip Drive Ecoland gikan sa Quimpo Boulevard Road ug padulong sa Coastal Road Rotonda.
Apan pag-abot sa lugar diin nahitabo ang aksidente, nabanggaan sa pick up ang gisakyang biseklita sa biktima nga dunay dalang balut ug tungod sa impact natumba ang biktima nga maoy hinungdan sa iyang hinanaling kamatayon.
Nagkatag sa kalsada ang mga balut nga paninda niini.
Gikustodiya na ang driver sa pick up sa Ecoland PNP alang sa dugang imbestigasyon samtang, gidala sa lokal nga punerarya ang patay’ng lawas sa biktima.
